HESUS anak ni MARIA ( Propeta hindi Diyos)

ISINULAT AT ITINIPON NI:

AHMAD JIBRIL SALAS

PANINIMULA

ANG MAIKLING PAGLALAHAD NA ITO AY TINANGKA UPANG BIGYAN-DAAN ANG MAGANDANG UGNAYAN NG MUSLIM AT KRISTIYANO SA LARANGAN NG RELIHIYON. ANG ISLAM AT KRISTIYANISMO AY KAPWA NANINIWALA SA DIYOS AT SA MGA PROPETA NG DIYOS.ANG ISLAM AT KRISTIYANISMO AY MAY PAGKAKA ALINTULAD SA MARAMING ASPETO. ANG TANGING KAIBAHAN AY NAKASALIG SA KATAUHAN NI HESUS.ANG KRISTIYANISMO AY NANINIWALA NA SI JESUS AY diyos-na-nagkatawang-tao AT SIYA AY ANAK NG DIYOS. NGUNIT ANG ISLAM AY NANINIWALA KAY HESUS HINDI BILANG DIYOS KUNDI BILANG ISANG DAKILANG PROPETA NG DIYOS.WALANG MUSLIM ANG MAAARING MAGING GANAP NA MUSLIM SA TUNAY NA DIWA NG ISLAM KUNG TINATALIKDAN NIYA SI HESUS BILANG PROPETA AT SUGO NG DIYOS. NANINIWALA ANG MGA MUSLIM NA SI HESUS ANG SIYANG MESIYAS (MESSIAH). NANINIWALA ANG MGA MUSLIM NA SI HESUS AY IPINANGANAK NI BIRHEN MARIA NA WALANG KINASASANGKUTANG LALAKI SA KANYANG PAGLILIHI.

NANINIWALA ANG MGA MUSLIM NA SI HESUS AY NAKAPAG-PAGALING NG MGA BULAG, KETONGIN SA KAPAHINTULUTAN AT KAPANGYARIHAN NG DIYOS. KUNG ATIN LAMANG BIBIGYAN NG MASUSI AT MAKATOTOHANANG PANANALIKSIK AT MAKABULUHANG PAG-AARAL ANG TUNAY NA PANGYAYARING UMIKOT SA BUHAY AT KATAUHAN NI

PROPETA HESUS NA NAPAPALOOB SA BANAL NA QURAN AT BIBLIYA KAKAMBAL NG REALISTIKONG PANG-UUNAWA SA BUHAY NIYA, MAAARING ITO ANG DAAN UPANG MAPATID ANG MATAGAL NG DI PAGKAKAUNAWAAN NG MAGKABILANG PANIG.

BAGO PA MAN SUMIKAT MULI ANG LIWANAG NG ISLAM (ANG RELIHIYON NG PAGSUKO AT PAGSUNOD SA DIYOS) SA PAMAMAGITAN NI PROPETA MUHAMMAD (SUMAKANYA NAWA ANG KAPAYAPAAN), MARAMI NA ANG NANINIWALA AT TUMATANGGAP KAY HESUS HINDI BILANG DIYOS O ANAK NG DIYOS KUNDI BILANG DAKILANG SUGO AT PROPETA NG DIYOS.KATULAD NG PANANAW NG ISLAM KAY HESUS,SIYA AY MINAMAHAL, IGINAGALANG AT TINITINGALA BILANG DAKILANG SUGO NA NAGBIGAY ARAL TUNGKOL SA PAGSAMBA SA TANGING ISANG DIYOS NG SANLIBU-TAN.

ANG BANAL NA QURAN AT MAGING ANG BIBLIYA AY NAGTUTURO SA ATIN NA KAILANMAN SI HESUS AY HINDI NAGSABI NA SIYA AY DIYOS AT DAPAT SAMBAHIN BILANG DIYOS O ANAK NG DIYOS. ISANG BAGAY NA KATOTOHANAN, SI HESUS AY LAGI AT LAGI NG NANGANGARAL O NAGTUTURO SA LAHAT NG KANYANG KINASASAKUPAN NA SAMBAHIN, PURIHIN, AT DAKILAIN ANG KANYANG PANGINOON AP PANGINOON NG LAHAT.

SA GANITONG KAAYUSAN, MINABUTI NAMING ILAHAD AT IHAYAG ANG ILANG KATOTOHANANG NAPAPALOOB SA BIBLIYA AT BANAL NA QURAN,SI HESUS BILANG ANAK NI MARIA NA ITINALAGA NG PANGINOONG DIYOS BILANG KANYANG PROPETA, SUGO, AT LINGKOD.

NAWA'Y MAGBIGAY AT MAGDULOT ITO NG MALINAW NA PANANAW SA LAHAT NG TAONG NAGHAHANAP NG GANAP NA KATOTOHANAN AT LIWANAG SA GITNA NG GANAP NA KATOTOHANAN AT LIWANAG SA GITNA NG BUHOL-BUHOL AT MASALIMUOT NA PANINIWALA AT PALA-PALAGAY NA NAKAPALIGID SA PAGSILANG,AT LAYUNIN NG DAKILANG PROPETA NG DIYOS, SI HESUS ANG ANAK NI MARIA.

I.HESUS bilang PROPETA ng DIYOS

Maraming bersikulo sa Bibliya (Bagong Tipan) ang nagpapatotoo at nagpapatunay na si Hesus ay hindi humigit sa isang PROPETA lamang. Halimbawa:

JUAN 7:40 " ang ilan nga sa karamihan,nang marinig ang mga salitang ito,ay nangagsabi, tunay na ito ang PROPETA."

JUAN 4:44 " Sapagkat si Hesus din ang nagpapatotoo na ang isang PROPETA ay walang kapurihan sa kanyang lupain."

LUCAS 24:19 " ang mga bagay tungkol kay Hesus na Nasareno, na isang PROPETA makapangyarihan sa gawa at salita sa harap ng Diyos at ng buong bayan."

LUCAS 7:16 " lumitaw sa gitna natin ang isang Dakilang PROPETA at dinalaw ng Diyos ang kanyang bayan."

LUCAS 13: 33 "Ako'y yumaon sa aking lakad ngayon at bukas at sa makalawa : sapagkat hindi mangyayari na ang isang PROPETA ay mamatay sa labas ng Jerusalem.

JUAN 6:14 " …totoong ito nga ang PROPETA na paparito sa sanlibutan."

HEBREO 3:1 "…inyong isipin ang Apostol (PROPETA) at Dakilang Saserdote na ating kinikilala, si Hesus.

JUAN 9:17 "… muling sinabi nga nila sa bulag, Ano ang sabi mo tungkol sa kanya (Hesus),na siyang nagpadilat sa iyong mga mata? At sinabi niya, Siya ay isang PROPETA."

II.HESUS Bilang SUGO AT LINGKOD ng DIYOS

Sa iba't ibang panahon at lupain,ang Panginoong Diyos ay pumili ng mga banal na tao upang gawing tagapaghatid ng Batas at Kautusan para sundin ng tao. Sa kasaysayan, mayroong mga Sugo ng Diyos na nauna pa kay Propeta Hesus katulad halimbawa nina Noah,Abraham, David,Aaron,at Moises. Ito ay malinaw na matutunghayan sa Bibliya at maging sa Banal na Quran.Si Hesus ay itinuring na isa sa Dakilang Sugo at Lingkod (Alipin) ng Diyos.Sa Bibliya nakatala si Hesus bilang Sugo at Lingkod (Alipin) ng Diyos.Halimbawa:

MATEO 15:24 "… hindi ako ISINUGO kundi sa mga tupang nangaligaw sa bahay ni Israel."

MGA GAWA 3:13 " Ang Diyos ni Abraham at ni Isaak at Jacob at ang Diyos ng ating mga magulang ay niluwalhati ang kanyang LINGKOD na si Hesus."

MGA GAWA 4:27 "sapagkat sa katotohanan sa bayan ito'ng laban sa inyong banal na LINGKOD na si Hesus."

MATEO 12 :18 "narito ang LINGKOD ko na Aking hinirang ."

JUAN 17:3 "at ito ang buhay na walang hanggan, na Ikaw ay makilala nila na iisang Diyos na Tunay na si Hesus bilang iyong SUGO."

JUAN 8:42 "sinabi sa kanila ni Hesus,Kung ang Diyos ang inyong Ama, ay inyong ibigin ako sapagkat ako'y nagmula at nanggaling sa Diyos, sapagkat hindi ako naparito sa aking sarili , kundi SINUGO niya Ako."

III.HESUS Hindi DIYOS na NAGKATAWANG-TAO

Sa iba't ibang relihiyon, ang pinakadiwa at kaisipan ng kani-kanilang tagasunod tungkol sa Diyos ay yaong na TAGAPAGLIKHA ay naging isang NILIKHA. At dahil nga sa paniniwalang ito,sila ay sumasamba sa inaakala nilang Diyos. Halimbawa, sa relihiyong Buddhismo, pinaniniwalaan nila na si Buddha ay diyos na nagkatawang -tao.Sa Hinduismo, naniniwala din na ang Diyos ay sumanib o napapaloob sa katawan ng mga bagay na katulad halimbawa ng baka , elepante , halaman o mga bagay na inaakala nilang naroon ang Diyos. Sa Judaismo naman, bagamat sila ay naniniwala sa Isang Diyos na Tagapaglikha, sila ay nagbibigay ng mga katangiang angkop lamang sa tao kaya't mababasa natin sa Lumang Tipan na ang Diyos ay namamahinga sa ika-pitong araw o dili kaya ay nagsisisi.Ang pamamahinga at pagsisisi ay gawaing angkop lamang sa tao na nilikha na may angking kahinaan.Ang lahat ng paniniwalang ito ay salungat at hindi umaayon sa tunay na utos ng Diyos . Ang paniniwalang ang Diyos ay nagkatawang-tao o naging isang nilikha ay ganap na salungat sa mga Aral ng mga Propeta. Ang pagsamba ng tao sa isang bagay na nilikha lamang maging ito ay kapwa tao,propeta, hayop o halamanan ay isang hayag na Idolotriya na sa kabuuan ay isang malaking kasalanan na walang kapatawaran . Ang Bibliya (Lumang Tipan) ay nagpatunay nito bilang babala sa tao:

EXODUS 20:3-4 "Huwag kang magkakaroon ng ibang diyos sa harap ko. Huwag kang gagawa para sa iyo ng larawang inanyuhan o ng kawangis man ng anumang anyong nasa itaas sa langit o ng nasa ibaba ng lupa,o ng nasa tubig sa ilalim ng lupa ."

EXODUS 20:23 "Huwag kayong gagawa ng ibang mga diyos na inaagapay sa akin."

ISAIAS 44:9 "Silang nangagbigay anyo sa larawang inaanyuhan ay walang kabuluhan silang lahat at ang kanilang mga bagay na kinalulugdan ay hindi napapakinabangan."

Karamihan sa relihiyong Kristiyanismo,ganito rin ang naging paniniwala nila tungkol kay Propeta Hesus. Si Hesus na isang Propeta at Sugo ay ginawang diyos at sinamba bilang diyos. Kahit isang bersikulo sa Bibliya walang mababasa na si Hesus ay nagsabi na siya ay taong naging Diyos.Sa aklat ni Oseas, ang Diyos ay tuwirang sinabi Niya na:

OSEAS 11:9 "Sapagkat Ako ay Diyos,hindi tao."

Binigyang liwanag din ng isang bersikulo sa Bibliya na ang Diyos kailanman ay hindi magkakatawang tao at hindi siya maaaring maging anak ng tao.Ang Diyos ay nagwika:

MGA BILANG 23:19 " Ang Diyos ay hindi tao na magsisinungaling o ni anak ng tao na nagsisisi."

Kaya't sinomang tao ay hindi maaaring tawaging Diyos o anak ng Diyos. Si Hesus ay anak ng tao, katulad ng nakasaad sa ibang bersikulo ng Bibliya:

MATEO 16:27 "Sapagkat ang Anak ng tao (Hesus) ay paparitong nasa kaluwalhatian ng kanyang Ama.

MATEO 16 28 " Hanggang sa kanilang nakita ang anak ng tao (Hesus) na pumarito sa kaniyang kaharian."

Katotohanan, maging ang mga disipulo ni Hesus o kahit pa si Birhen Maria ay hindi kailanman sumamba kay Hesus.May isang pagkakataon na si Hesus ay inaakit ni Satanas. Si Satanas ay nagsabi na sumamba lamang si Hesus kay Satanas, kanyang ibibigay ang lahat ng maibigan. Ngunit si Hesus ay nagbigay ng matibay na kasagutan. Siya (si Hesus) ay nagsabi:

LUCAS 4:8 "… nasusulat, sa Panginoong Diyos sasamba ka at Siya lamang ang iyong paglilingkuran."

ANG BINYAG ni HESUS

Ang pagbibinyag ay isang paglilinis ng kasalanan. Si Hesus ay bininyagan ni Juan Bautista na isang kinikilalang Propeta. Kung si Hesus ay Diyos,maaari bang binyagan ng isang tao lamang ang Diyos natin na Siyang Tagapaglikha ng buong sanlibutan? Makatuwiran bang binyagan ang Diyos na Lubos na Kabanalan at Kadakilaan? Hindi angkop sa Kabanalan at Kapangyarihan ng Diyos na iugnay Siya sa bagay na gawain lamang ng isang tao.

ANG PAGDARASAL ni HESUS

Ang pagdarasal ay isang uri ng pagsamba at tanda ng pananampalataya sa Diyos. Katulad ng gawa ng isang Muslim, mababasa natin sa Bibliya na si Hesus ay nagdarasal.

MATEO 26:39 "…at siya'y nagpatirapa at nanalangin."

Kung si Hesus ay Diyos na nagkatawang-tao, kanino siya nagdarasal? At dahil nga si Hesus ay nagsasagawa ng dasal,ito ay nangangahulugan na siya ay may kinikilalang Diyos na kanyang sinasamba .

ANG PAG-AAYUNO NI HESUS

Ang pag-aayuno ay isang banal na gawain na naglalarawan ng ganap na pagsamba at pagsunod sa Batas ng Diyos.Ang lahat ng Propeta ng Diyos nag-aayuno upang ilarawan sa tao kung paano maisakatuparan ang tunay na diwa ng pananampalataya at pagsamba.Kaya si Hesus ay makikita na nagsasagawa nito.

MATEO 4:2 "at ng siya'y nakapag-ayuno ng apat-napung araw at apat-napung gabi,siya ay nagutom."

Kung si Hesus ay Diyos hindi siya maaaring pumailalim sa batas ng Pag-aayuno.

ANG MGA KAPATID NI HESUS

MATEO 13:55 "Hindi baga ito ang anak ng anluwagi? Hindi baga tinatawag na Maria ang kaniyang ina? At Santiago (James) ,Jose (Joses) at Simon at Judas ang kanyang mga kapatid?

Kung si Hesus ay Diyos, maaari din ituring ang mga kapatid niya bilang mga Diyos sapagkat iisa ang kanilang lahi at dugo, (Dugong Diyos o Lahing Diyos) Astagfirullah!

At kung si Santiago, Jose, Simon at Judas ay kapatid ni Hesus sa Ina (Birhen Maria) ano ang tawag ng mga kapatid ni Hesus sa kanya. Kuya ko o Diyos ko? At si Birhen Maria paano niya tinatawag si Hesus? Anak Ko o Diyos Ko?

Kaya nga ba ang pagturing kay Hesus bilang Diyos ay hindi lamang paglapastangan sa Kabanalan at Kadakilaan ng Maykapal kundi ito ay isang insulto sa talino at karunungan ng tao.

ANG PANUNUKSO NG DIYABLO KAY HESUS

MATEO 4:11 "inihatid ng espiritu santo si Hesus sa ilang upang siya ay tuksuhin ng diyablo."

Paano naging Diyos si Hesus kung siya ay tinutukso ng Diyablo? Ang Diyablo ay isa lamang nilikha ng Diyos.Walang kapangyarihan ang maaaring makapaghamon sa Diyos sapagkat ang lahat ng kapangyarihang taglay ng isang nilikha ay nagmumula sa Diyos na Siyang may Hawak ng Ganap na Kapangyarihan.Katulad ng nakasulat sa Bibliya (Bagong Tipan) ang tunay na Diyos ay hindi natutukso.

SANTIAGO 1:13 "Sapagkat ang Diyos ay hindi matutukso at hindi rin naman siya nanunukso sa kaninoman.

ANG PAGPAKO KAY HESUS

MATEO 27:35 "…at nang siya ay kanila ng maipako sa krus."

Maaari bang ang TAGAPAGLIKHA ay ipako ng kanyang NILIKHA? Ang kapangyarihan ba ng inilikha ay maaaring mangibabaw kaysa kapangyarihan ng Tagapaglikha? Dito lamang sa pangyayaring ito makikita natin na kung ganap nating bigyang katuwiran at tamang kaisipan,magiging maliwanag sa atin na si Hesus ay hindi Diyos kundi taong may taglay na kahinaan at pangangailangan.Iba ang Tagapaglikha at iba rin naman ang nilikha.Ang Tagapaglikha ay mananatiling Tagapaglikha at ang nilikha ay mananatiling nilikha.

ANG PANAGHOY NI HESUS

MATEO 27:46 "At nang malapit na ang oras na ika-siyam ay sumigaw si Hesus ng malakas na tinig, na sinabi:ELI,ELI, lama sabachthani? Samakatuwid baga'y, DIYOS KO, DIYOS KO, bakit mo ako pinabayaan?

Bakit kailangang ituring ng ibang kristiyano si Hesus bilang diyos samantalang si Hesus ay tumatawag ng " DIYOS KO, DIYOS KO,? Ang malakas na sigaw ni Hesus ay isang patunay na siya ay may kinikilalang Diyos at hindi niya itinuturing ang kanyang sarili bilang diyos.

ANG PAGTUTULI KAY HESUS

LUCAS 2:21 "makaraan ang walong araw upang tuliin siya, tinawag siyang Hesus."

Ang pagtuli ay isang gawaing may layuning mapanatili ang kalinisan.Ito ay unang ginawa ni Propeta Abraham at ang panganay na anak na si Ismael bilang tanda ng ganap na pagsunod sa kasunduan sa Diyos.Ang gawang pagtuli ba ay maaaring iugnay sa Diyos na Ganap at Puno ng Kadakilaan? Astagfirullah!

ANG ARAW NG PAGHUHUKOM

MARCUS 13:32 "… sapagkat sa araw na yaon o oras na yaon kahit mga anghel sa langit kahit anak kundi ang Ama"

Si Hesus ay nagsabi na walang tao o anghel at maging ang kanyang sarili ang nakakaalam sa araw ng Paghuhukom.Paano naging Diyos si Hesus kung ang Araw ng Paghuhukom ay hindi niya batid? Ang Tunay na Diyos ay nakababatid ng lahat ng bagay.Ang lahat ng galaw, pangyayari at kilos ay nasa kaalaman ng Makapangyarihang Diyos.

ANG KAMATAYAN NI HESUS (AYON SA BIBLIYA)

ROMA 5:6 "Sapagkat nang tayo ay mahihina pa ay namatay si Kristo sa kapanahunan dahil sa mga masama."

Ayon sa Bibliya si Hesus ay namatay.Kung si Hesus ay Diyos at siya ay namatay sino ang nagpanatili sa mundo at ng lahat ng bagay na may buhay? Sino ang tagapangalaga ng lahat ng kabuhayan dito sa mundo kung patay ang Diyos?Ang kamatayan ay hindi maaaring taglayin ng Tunay na Diyos.Sa katunayan si San Pablo ay nagsabi na ang Tunay na Diyos ay:

I TIMOTEO 6:16 " Siya lamang ang walang kamatayan , na nananahanan sa liwanag na di malapitan, na di nakita ng sinomang tao."

Ang mga pangyayaring namuo sa buhay ni Hesus ay mga pangyayaring nagpapatunay na siya ay taong inilunsad ng Diyos bilang Kanyang PROPETA at SUGO. Ang mga mga gawaing pang-araw ni Hesus, ang kanyang damdamin,kilos at galaw ay likas na larawan ng isang nilikhang sumasamba at kumikilala sa Diyos.Ang kanyang pagsilang , paglaki at pangangaral ay mga banal na layunin na kanyang ginawa bilang pagtupad sa Kautusan ng Diyos.

ANG KAPANGYARIHAN NI HESUS

Ang kapangyarihan ni Hesus ay nagmula sa Diyos.Ang sinomang nilikha ay ganap na umaasa lamang sa Diyos kaya si Hesus ay kanyang sarili ay walang kapangyarihan.Lahat ng kanyang ginagawa ay hindi sa ganang kanya kundi sa pamamagitan ng Diyos na nagsugo sa kanya.

MGA GAWA 2:22 "… Kayong mga lalaking taga Israel, pakinggan ninyo ang mga salitang ito, si Hesus, na taga Nazareth, lalaking pinatunayan ng Diyos sa mga kababalaghan at mga tanda na ginawa ng Diyos sa pamamagitan niya sa gitna ninyo gaya rin ng nalalman ninyo.

JUAN 5:30 " hindi ako makagagawa ng anuman sa aking sarili."

LUCAS 11:20 "… sa pamamgitan ng daliri ng Diyos ay nagpapalabas ako ng mga demonyo."

MATEO 12:28 "… sa pamamagitan ng Espiritu ng Diyos ay nagpapalabas ako ng demonyo."

Maliwanag na kailanman ay hindi maaaring maging Diyos si Hesus sapagkat ang isang katangian ng isang Tunay na Diyos ay ang Kaganapan ng Kapangyarihan. Ngunit si Hesus ay umamin sa kanyang sarili na wala siyang magagawa.

ANG MGA BANAL NA SALITA NI HESUS

JUAN 14:6 "…ako ang daan at katotohanan."

Ang bersikulong ito ay hindi dapat ipakahulugan na si Hesus ay Diyos.Ang lahat ng Propeta sa kani-kanilang panahon ay itinuturing na Daan at Katotohanan sapagkat sila ang pinagkatiwalaan ng Diyos upang akayin ang lahat ng tao sa landas tungo sa kaligtasan. Ang mga Propeta ang siyang may hawak ng Katotohanan.Halimbawa, sa panahon ni Propeta Noah, sinoman ang hindi sumunod sa aral ni Noah ay nalunod. Sa panahon ni Moises , lahat ng taong nagtakwil sa mensahe ni Moses ay nalunod din.Ang Daan at Katotohanan ay taglay ng lahat ng Propeta.Kung ang Daan at Katotohanan ay para lamang kay Hesus, paano na lamang ang mga taong nauna sa panahon ni Hesus, sila ba ay walang kaligtasan? Ang Diyos ay Makatarungan at hindi Niya maaaring gawin ang isang bagay na hindi makatuwiran.Ang kaligtasan ng lahat ng tao ay matatamo sa pamamagitan ng pagsunod sa mga Propeta sapagkat ang pagsunod sa kanila ay pagsunod din sa Diyos.Magkakaroon lamang ng kahulugan ang pananampalataya ang isang tao kung sinusunod niya ang mga aral ng Propeta sapagkat sila ang tanging daan at katotohanan.

JUAN 10:30 "…ako at ang ama ay iisa."

Karamihan sa mga Kristiyano ang kanilang kaisipan sa bersikulong ito ay si Hesus at ang Diyos isa sa pagiging isang Diyos.Ngunit katulad ng ating paliwanag sa itaas,ang lahat ng gawa ni Hesus,ang kanyang pagsilang, pamumuhay, pangangaral,pagdarasal,pag-aayuno, pagtuli, panalangin,pagbinyag ay mga tanda ng isang taong may pananampalataya sa Diyos.Ang pagiging isa ni Hesus at ng Diyos ay hindi sa pagiging Diyos kundi sa Layunin.Mula sa unang tao layunin na ng Diyos na ang Kanyang mga nilikha ay pag-isahin at akayin sa isang matuwid na landas.At upang magkaroon ng katuparan ang layuning ito, pumili siya ng mga Propeta upang makiisa sa Kanyang layunin na dalhin ang tao sa tamang patnubay.Kaya't ang layuning ito ng Diyos ay siya ring layunin ng lahat ng Propeta mula kay Adan,Noah,Abraham,Moises,Hesus at Muhammad (Sumakanila nawa angKapayapaan).

Samakatuwid, kapag ang isang tao ay nanampalataya at sumamba ayon sa aral ng mga Propeta, ang mga Propetang ito ay titiyakin na ang tao ay mananatili sa pananampalataya, ang Makapangyarihang Diyos ay magbibigay liwanag sa taong may pananampalataya upang ito ay manatili sa tamang landas ng buhay.Kaya't ito ang layunin ng Diyos at ng lahat ng Propeta at ng lahat ng yaong may tamang pananampalataya.

Philippines